Gihupay sa Department of Health ang nagsaka nga kabalaka sa publiko kalabot sa pagkuyanap sa monkey pox virus sa Pilipinas.
Gitin-aw ni DOH Secretary Teodoro Herbosa nga limitahan una ang pagpatuo sa katawhan ang mga “fake news” nga nagkatag karon sa managlahing social media platforms sama sa Meta, Tiktok ug bisan sa Instgram.
Gikondinar ni Teodoro ang mga tawong nagpaluyo sa hiwi nga mga impormasyon nga mihatag kahadlok, ug pagpanik sa katawhan batok mpox.
Gitin-aw ni Herbosa nga ang pagsul-ob sa facemask sulod sa mga hospital ug pagpatuman sa facemask policy sa pipila ka LGU’s, usa lamang ka precautionary measure.
Gawas niini, gibasura sa kalihim sa panglawas ang report nga adunay mahitabong lockdown sa mga syudad nga adunay kaso sa mpox. Gitataw sa DOH nga sexually transmitted ang mpox, ug mahimo usab kining “skin to skin contact”.
Hisayran nga sukad tuig 2024, ang kaso sa mpox sa nasud mirehistro na sa 911, ug wala pay napamatud-ang mpox ang hinungdan sa pagkamatay tungod kay luya nga klase sa variant ang anaa sa Pilipinas.
Gimentinar sa ahensya nga ang pinaka delikadong variant sa mpox, ang Clade I-b, didto namatikdan sa mga nasud sa Central ug West Africa.
Dinhi sa Pilipinas, nagpabiling Clade II ang mikuyanap nga bayrus sa Iloilo City ug Iloilo Province sa Visayas; South Cotabato, Maguindanao del Norte, Zamboanga Sibugay ug Sa Davao City, sa Mindanao.
