CAGAYAN DE ORO CITY, Philippines – Namugos ang Philippine National Police nga walay nalapas nga tawhanong katungod o harassment sa pamilya ni kanhi Presidente Rodrigo Duterte sa adlaw nga siya gisikop ug gidala sa The Hague, Netherlands.
Mipasabot si PNP Spokesperson Brigadier General Jean Fajardo nga gihatagan sa igong oras aron mapahiling sa doktor, ug makakuha’g abogado ang pamilya ni Duterte ug imposible nga mahitabo ang pugsanong pagpasakay kaniya sa abyon nga maoy nagdala kaniya padulong sa korte sa ICC.
Miingon si Fajardo nga ang tanan hitabo sinaksihan sa mga DOJ Representatives, kadagkuan sa CIDG, NBI ug uban pang enforcement agency.
Una niini, nag viral na sa social media ang pamahayag ni CIDG Chief Nicolas Torre nga iyang guyuron ang kanhi Presidente pagawas sa usa ka lawak aron pugsanon nga ipalupad sa The Hague niadtong Marso 11 sa gabie.
