CAGAYAN DE ORO CITY-Nagtoo ang Criminal and Investigation Detection Group o CIDG-10 nga nakasibat ang wanted nga si Misamis Occidental board member Ricardo “Ardot” Parojinog kauban si kanhi barangay chairman Tarsicio Barros sa gihimong operasyon sa Libona, Bukidnon kaganinang kadlawon.
Matud ni CIDG Cagayan de Oro Team head Supt Melgar Devaras nga may nadawat sila nga impormasyon nga nagtago sa teritoryo sa pamilyang Barros si Parojinog hinungdan nga ilang gipangandaman ang operasyon ug nangayo’g tabang sa SAF troopers gikan Lanao del Norte.
Kahinumduman nga gitas-an na ni Pres Rodrigo Duterte hangtud P5 milyon ang ihatag nga reward money sa mga sibilyan nga makatudlo sa gitaguan sa wanted nga si Parojinog.
Nanawagan usab si Devaras sa nakasibat nga si kanhi barangay chairman nga boluntaryong motahan sa mga otoridad.
Si Devaras miingon nga dili sila mohunong paggukod kang Barros ilabina nga nasayod sila nga kauban niini sa pagsibat ang wanted nga si Misamis Occidental board member Ardot Parojinog.
Hisayran nga anaa sa mga kamot sa pulis ang asawa niini nga si incumbent Kinawe Brgy Kapitan Cherry Barros ug siyam ka private army niini.
Nakumpiskar usab sulod sa ilang panimalay ang 11 ka armas, duha ka granada, mga bala ug gamit pagpamomba.
Una niini, tulo ka sundalo ang samaran sa dihang gisilbi sa CIDG ang unom ka search warrants gikan korte batok sa magtiayon human misukol ang ilang mga private army.
Samtang gikumpirmar usab ni acting Libona Mayor Al Edralin nga wala miduso sa ilang certificate of candidacy kon CoC’s ang magtiayong Barros alang sa umaabot May 14, 2018 elections.
Sumala ni Edralin nga base sa ilang gihimong monitoring, wala nay laraw magpapili pagka-kapitan si Tarsicio Barros samtang last term na usab isip punong barangay sa ilang lugar ang asawa niini nga si Cherry Barros.
Hisayran nga base sa report sa CIDG, si Tarsicio ang naila nga land grabber ug nalambigit sa illegal mining sa Bukidnon.
Giangkon ni Edralin nga naggikan sa Misamis Occidental ang kaliwatan nila ni Barros.
Kini ang rason nga dako ang posibilidad nga tinood ang impormasyon nga anaa nagtago sulod sa panimalay sa pamilyang Barros ang wanted nga si board member Ardot Parojinog.
Apan gitin-aw niini nga wala siya’y kasayuran kon tinood ang maong impormasyon ilabina nga wala niya makita mismo ang presensiya sa suspek ubos sa ilang area of responsibility.
