CAGAYAN DE ORO CITY- Gipasalig sa 58th IB,Philipine Army ang paghatag seguridad sa katawhan batok sa dala nga bahad sa pagpanghasi sa rebeldeng New People’s Army o NPA.
Kini bisan nga mibati’g kabalaka si Misamis Oriental Gov Bambi Emano nga mohatag sa grabeng dili maayong epekto ang subli pag-engkuwentro sa militar ug mga rebelde sa pipila ka lungsod sa lalawigan.
Gibutyag ni 58th IB spokesperson 1Lt Janelle Diaz nga aktibo pa nga gipatuman nila ang all out war batok mga rebelde aron maabog sila nga dili mohimo’g kasamok sa malinawong katawhan sa lalawigan.
Samtang giisa karon sa PNP-10 ang full alert status tungod sa subli pag-aktibo sa kalihukan sa rebeldeng New People’s Army o NPA sa rehiyon.
Kini human nalutsan ang intelligence monitoring sa kapolisan ug militar diin nakapahigayon sa road re-blocking ang 100 ka NPA fighters sa lungsod sa Medina,Misamis Oriental sa miaging adlaw.
Gibutyag ni PNP regional spokesperson Supt Lemuel Gonda nga dili magahom sa gobierno ang pagbantay sa mga rebelde diin magpaka-sibilyan kon gukdon na sa militar.
