Giklaro sa buhatan sa Police Regional Office 10 nga wala na naglungtad sa area of responsibility sa rehiyon ang OzamiZ Waray-Waray Group ug ang Martilyo Gang, mga grupong ilado kaniadto sa ilang modus nga pagpanulis.Namahayag si PRO-10 Spokesperson PMAJ Joan Navarro sa interbyu sa Bombo Radyo nga ang dinakpan sa miaging semana nga suspetsadong tulisan, nga giilang miyembro sa usa ka organisadong grupo, usa diay ka karaang takas sa New Bilibid Prison. Matod pa ni Navarro, ang maong indibidwal nahukman na kaniadto sa kasong murder ug evasion of sentence, ug gikonsiderar usab nga usa sa mga top wanted persons sa rehiyon.Para ni Navarro, dakong kalampusan kini alang sa kapulisan tungod kay napugngan ang posible pang mga krimen nga mahimo unta niyang mabuhat ug napanalipdan ang mga sibilyan nga posibleng mahimong biktima.Gipasabot usab niya nga ang pagkaaresto sa maong kriminal wala nagpasabot nga adunay pagbalik o resurgence sa maong grupo, tungod kay ang krimen nga iyang nabuhat, matod pa, personal nga buhat ug dili na konektado sa usa ka organisadong grupo nga dugay nang napatun-an. (James Oliver)
