CAGAYAN DE ORO CITY – Dili tugtan ni Commission on Elections o Comelec 10 regional director Atty Renato Magbutay nga mga sibilyan ang mopatuman sa citizen’s arrest batok sa mga mohimo’g vote buying ug selling sa May 12 elections.
Kini may kalabutan sa kamanduan sa Comelec-Manila nga gamiton ang warrantless arrest batok sa mga politiko,ilang mga lumilihok ug bisan sa mga botante nga molambigit sa kalihukang pagmapalit sa boto.
Gibutyag ni Magbutay nga isalig gihapon nila kini sa mga otoridad aron kalikayan nga mabutang sa peligro ang kinabuhi sa mga sibilyan.
Miingon si Magbutay nga gihan-ay pa nila ang ensaktong gabayan alang niini sa dili pa mahitabo ang piliay.
Una usab niini,nangayo’g tabang si Police Regional Office o PRO 10 Director Brig Gen Jaysen De Guzman sa mga abogado sa gobierno sa pagsiguro nga dili mabutang sa alanganin ang mga pulis nga mosanong sa kasuguan sa Comelec.
Sulod ning semanaha,tukion sa Comelec kuyog ang PNP ug AFP ang maong kamanduan.
