Operational na ang Waste Water Treatment Facility sa Carmen Public Market sa Cagayan de Oro, human kini gi-turn over sa City Engineering Office niadtong Hulyo 2025. Ang proyekto gipatuman sa City Economic Enterprises and Business Development Administration (CEEBDA) isip kabahin sa CDO-RISE Agenda ni Mayor Rolando “Klarex” Uy, nga nagpunting sa limpyo ug luwas nga palibot sa mga pampublikong merkado. Giturn-over kini sa City Engineering Office uban sa suporta sa DENR-Environmental Management Bureau Region 10. Mitambong sa seremonya sila Mayor Uy, DENR-EMB Director Reynaldo Degamo, ug mga opisyal sa Barangay Carmen.
Sumala ni Director Degamo, ang pasilidad adunay kapasidad nga 240 cubic meters kada adlaw ug naglangkob sa walo ka stages sa paglimpyo sa wastewater gikan sa merkado ug palibot. Ang proseso naglakip sa screening, sedimentation, biological treatment, ug disinfection aron masiguro nga ang tubig nga mogawas dili makadaot sa kalikupan. Ang proyekto gilaraw aron makasunod sa Republic Act 9275 o Clean Water Act ug sa mga pamantayan sa DENR-EMB. Gilauman nga kini makapakunhod sa polusyon sa tubig ug makahatag og mas limpyo nga palibot sa mga vendors ug mamalitay.
Gipadayag ni CEEBDA Head Mary Sean Molig nga ang proyekto usa ka modelo sa urban sanitation nga giplano nga sundon sa ubang pampublikong merkado sa syudad. Sa annual procurement plan sa Cagayan de Oro LGU, adunay 11 pa ka wastewater treatment projects nga nagkantidad og PHP632.3 milyon nga ipatuman sa lain-laing merkado sa syudad. Ang pasilidad sa Carmen usa sa mga prioridad sa administrasyon ni Mayor Uy alang sa kalimpyo, kahimsog, ug kalikupan. Gidasig ang publiko nga suportahan ang mga inisyatibo sa syudad alang sa mas maayong kalidad sa kinabuhi ug palibot.
