Gikonsidera sa kagamhanang lokal sa Cagayan de Oro nga usa ka dakong hagit ug sakripisyo ang pagpahigayon og water rationing sa higayon nga hingpit nang moigo ang epekto sa Super El Niño sugod karong bulana hangtod sa Mayo o Hunyo sa sunod tuig.
Gibutyag ni City Information Officer Jade Adeser nga dili basta-basta ang maong lakang ilabina nga nag-unong sa kapin 800,000 ka populasyon ug lakip na ang mga mag-uuma sa dakbayan ang direktang maapektohan niini.
Segun ni Adeser gitawag na ni Mayor Rolando “Klarex” Uy ang mga kapitan ug mga opisina sama sa CLENRO aron magtinabangay sa pagpangandam.
Tungod niini, gi-kansela na usab ang official Christmas party sa dakbayan aron ang gigahin nga pondo i-divert diretso isip contingency budget sa pag-atubang sa maong krisis.
