Gidepensa ni Presidente Ferdinand Marcos Jr ang katukuran sa Independent Commission on Infrastructure (ICI).
Gihimo sa presidente ang pagpasabot sa press briefing nga gilusad sa Malakanyang karong buntag.
Miingon si Marcos nga mulangkob sa MILABAY nga 10 ka tuig ang IMBESTIGARAN sa Independent Commission on Infrastructure (ICI) kay sakop niini ang tanang anomalya sa flood control ug uban pang infrastructure projects sa nasud sulod sa dekada.
Kini nakalatid sa iyang Executive Order No. 94, kundiin ang komisyon gitukod aron masusi ang mga proyekto nga posibleng nalambigit sa korapsyon, pag-abuso sa pondo, ug paglapas sa mga balaod sama sa Anti-Graft and Corrupt Practices Act.
Gibutyag ni Marcos nga ang napulo ka tuig nagpasabot nga seryoso ang gobyerno sa pagtan-aw sa pattern sa mga irregularidad, dili lang sa bag-o kundi apil na ang mga proyekto sa miaging administrasyon.
Gihatagan og gahum ang ICI sa pag-issue sa subpoena, pagkuha sa ebidensya, ug pagrekomenda og kaso batok sa mga responsable.
Sa laktod, gusto ni Marcos nga putlon ang dugay nang siklo sa korapsyon sa sektor sa infrastruktura pinaagi sa usa ka lawom ug halapad nga imbestigasyon.
Gitin-aw usab niini nga macontempt lamang ang mga tawong giimbestigaran kung dili sila mupatoo sa ipatawag nga imbestigasyon sa ICI.
Kung tan-awon, kini usa ka lakang nga posibleng makahatag og accountability—kung tinuod nga ipatuman og walay pagpili.
Una niini, nahinabi na ni Presidente Marcos ang naglangkob sa komisyon nga sila Rogelio “Babes” Singson, kanhi kalihim sa Department of Public Works and Highways (DPWH) ug si Rossana Fajardo, Country Managing Partner sa auditing firm nga SGV & Co.
Miingon ang presidente nga nagkasinabtanay na sila, kuyog ni Baguio City Mayor Benjamine Magalong nga sugdan na dayon ang imbestigasyon.
Gani, gibutayag sa presidente nga magsugod na ning adlawa, ang trabaho nila Singson ug Fajardo aron makamugna sa organizational decisions.
Gipamugos sa presidente nga kinahanglan na malihok ang pagporma sa ilang teams, asa ang lokasyon sa ilang opisina, ug ang mga papel nga gamiton sa imbestigasyon.
Gani sa pakighinabi ni Marcos sa duruha, nagkauyon si Singson ug Fajardo nga sila magtagbo adlaw-adlaw aron mapaspasan ang imbestigasyon.
Gipaniguro sa presidente nga dili manginlabot ang Malakanyang sa ilusad nga mga lakang sa ICI aron mapreserbar ang ilang pagka-independente.
Si Marcos miingon nga mahimong makapangayo sa update sa imbestigasyon ang gobyerno.
Dugtong niini, gipa-cancel ni President Ferdinand Marcos Jr. ang bag-ong pondo para sa flood control projects sa 2026 tungod sa duha ka mayor nga rason: una, wala pa magamit ang P350 billion nga budget sa 2025, kundiin gibutyag sa presidente nga daghan pa kaayong pondo nga wala magamit gikan sa 2025 nga budget para sa flood control. Mao nga wala pa’y panginahanglan nga magdugang sa bag-ong alokasyon sa 2026.
Ang tanan pondo, itunol sa sektor sa edukasyon, agriculture, panglawas, pabahay, infrastructure, ICT, Labor,ug social energy sector.
Ikaduha, aron masiguro nga kompleto ug walay ghost project, nagmando si President Marcos Jr., nga ibalik sa mga Local Government Units (LGUs) ang gahum sa pagdawat sa mga nahuman nga proyekto sa Department of Public Works and Highways (DPWH).
Tumong niini nga masuta kung sakto ba ang kalidad sa natapos nga infrastructure projects.
Mahinumduman nga sa panahon sa Duterte administration, gikuhaan sa tahas ang mga LGUs sa “final acceptance” sa mga proyekto sa DPWH.
Ang mga proyekto gi-turn over diretso sa national agencies, bisan pa nga wala’y klarong konsultasyon sa LGU.
Kini ang nabantayan ni Marcos hinungdan nga mi-ulbo ang mga anomaliya kay wala namay tahas ang barangay sa pagsuta kung nahuman ba, overpriced ug substandard ang mga natukod nga proyketo sa DPWH.
Sa gilusad nga press briefing gimando ni Marcos nga ma reinstate LGU Acceptance.
Ubos sa iyang mando mao ang LGU na ang mo-final inspect ug mo-approve sa mga nahuman nga proyekto sa ilang lugar.
“The SOP before was that before you release the project to the local government, it should be first accepted by the local government. And that’s something that we will reinstitute.”
Gibutyag ni Marcos nga NAKURAT siya dihang gilangkat kini nga palisya sa naglabay nga administrasyon.
Subli, gipamugos ni Marcos nga ang imbestigasyon, gitumong sa paglimpyo sa sistema, pag-review sa mga proyekto, ug pagpanubag sa mga sangkot.
Ang mga contractors nga nakalapas sa saktong proseso gipahimangnoan nga sila mismo ang mag-ayo sa ilang proyekto sa ilang kaugalingong gasto.
Sa katapusan, gi-anunsyo ni Marcos nga ang kanhi Presiding Justice sa Court of Appeals nga si Andy Reyes maoy mangulo sa Independent Commission.
Si Reyes, ingon ni Marcos. misugyot nga kinahanglan masugdan na ang kabag-ohan aron maputol na ang sistema sa kurapsyon sa mga ahensya.
