Nagsamot pagsaka ang sukod sa kaigang o heat index sa Pilipinas.
Ning adlawa, halos tanan bahin sa nasud, gawas sa Benguet (21°C) makasinati sa heat index nga gibana-bana sa 37°C ngadto sa 40°C.
Ang labing igang nga syudad ning adlawa mao ang Cotabato sa Maguindanao.
Sa pikas bahin, unom ka syudad sa Pilipinas ang apektado sa gibana-bana 40°C.
Kini gilangkoban sa Dagupan City sa Pangasinan, Tuguegarao City sa Cagayan, Coron City sa Palawan, San Jose City sa Occidental Mindoro, Mambusao sa Capiz City, ug La Carlota sa Negros Occidental.
Ang Aparri Cagayan, Camaling Tarlac, Virac Catanduanes, Masbate City sa Masbate, Dumangas Iloilo, Catbalogan Samar, ug Zamboanga City pulos makatagamtam sa kaigang nga musukod sa 39°C.
Ang Manila ug ubang bahin sa National Capital Region makatagamtam sa 36°C nga heat index sugod alas 11 sa buntag hangtud sa alas-5 sa hapon. Hinoon, mubugnaw ra ang palibot tungod sa kasarangan nga paghuyop sa hangin nga muabot sa 23km matag oras pag-abot sa alas-5 sa hapon. Adunay masinatiang panagsang pagdag-um apan, nipis ra ang tsansa sa pag-ulan.
Ang Central Visayas maigo sa 35°C nga kainit sa palibot sa pagka-alas 12 sa udto padulong sa alas 5 sa hapon. Anaa lamang sa 12km matag oras ang huyop sa hangin. Adunay 14% nga tsansa sa pagpanaligsik sa kagabion.
Ang Western Visayas makasinati sa “sunny day”. Apan magsugod ang pagpangiit sa kainit ug kaigang sa pagka-alas-11 sa buntag nga muabot sa 35°C kutob sa alas 4 sa hapon. Hinoon, makahatag sa alibyo ang kasarangan nga paghuyop sa hangin nga muabot sa 23km matag oras sa bandang alas 5 sa hapon.
Ang Eastern Visayas makatagamtam sa 35°C nga kaigang sa bandang alas 12 sa udto hangtud sa alas 3 sa hapon. Ang huyop sa hangin anaa lamang sa 3km matag oras sa buntag, apan sa gabie anaa na sa 12km matag oras. Adunay 23% tsansa sa pagpanaligsik apan dili lahutay.
Ang Northern Mindanao, ilabe na sa syudad sa Cagayan de Oro ug Misamis Oriental maigo sa 36-37°C nga heat index. Magsugod sa pagpangi-it ang kainit sa alas 11 sa buntag hangtud sa alas 4 sa hapon. Hinoon, maka-alibyu ra ang 15km matag oras nga huyop sa hangin sa bandang alas 2 sa hapon. Anaa sa 25% ang tsansa sa pag-ulan sa bandang gabie.
