CAGAYAN DE ORO CITY – Gisugdan na sa pagbansay-bansay sa World Health Organization o WHO ang local health experts gikan sa duha ka ospital ug DoH aron ipakusog ang kampanya batok coronavirus disease ning syudad.
Kini human personal nga midalikyat ang WHO expert gikan sa Zamboanga City aron tudluan ang technologists kabahin sa pag-operate sa RT-PCR machines gikan sa Northern Mindanao Medical Center,Polymedic Hospital ug DoH-10 alang sa maong katuyuan.
Miingon si Dr Ian Gonzales,head sa infectious diseases cluster sa DoH-10 nga komplikado ang maong trainings ayha makaabot sa proficiency test ang mga partisipante.
Tuyo niini nga mismo na ang rehiyon ang magbaton sa kapas nga mopagawas sa resulta sa mga pasyente nga suspected COVID-19 carriers sa umaabot panahon.
Samtang gianunsyo ni City Mayor Oscar Moreno nga mahimo nang operational sunod bulan ang upat ka mga testing facilities sa syudad.
Siya miingon nga gawas sa NMMC ug regional office sa Department of Health, mabutangan usab sa testing facilities ang JR Borja General Hospital ug Maria Reyna-Xavier University Hospital.
Gani, gimanod na niini nga magpalit sa dugang duha ka RT-PCR machines alang sa NMMC.
Dugang niini nga kon ugaling mahimo nang operational ang mga pasilidad, pagasugdan gilayon sa City Health Office ang ilang targeted testing project.
