CAGAYAN DE ORO CITY – Gikompirmar ni DoH-10 Infectious Diseases Cluster chief Dr. Ian Gonzales nga mahidangat ang mga eskperto gikan sa World Health Organization sa syudad karong adlawa.
Kini aron bansayon ang medical technologists, technicians ug medical staff sa Department of Health DOH-10 ingon man Polymedic Medical Plaza sa paggamit sa reverse transcription-polymerase chain reaction machines.
Si Gonzales miingon nga molungtad sa usa ka semana ang training ayha ang proficiency testing.
Samtang pabilin gihapon nga siyam ang ihap sa mga nagpositibo sa coronavirus disease o Covid-19 sa dakbayan. Kini human masuta ni City Epidemiologist Dr. Joey Retuya nga residente sa Iligan City ang 26-anyos nga Architecture graduate kinsa pinakaulahing nagpositibo sa bayrus.
Siya miingon nga gikan sa Cebu City ang pasyente ug nakaabot kini sa syudad niadtong May 19. Ila kining gipaubos sa swab testing human makasinati sa pag-ubo. Gisubay na sa CHO ang mga pasahero nga nakadungan sa pasyente pabalik sa Amihang Mindanao.
