CAGAYAN DE ORO CITY – Nakasuhan na sa multiple homicide ug multiple physical injuries ang wing van driver nga misungag sa urban nga puno sa mga naka-schooling nga mga pulis sa Poblacion,Naawan,Misamis Oriental sa miaging Sabado.
Kini subay sa ulahing impormasyon nga gilugwa sa Police Regional Office 10 nga nasubo pag-ayo sa hitabo.
Miingon si PRO 10 spokesperson Police Maj. Joann Navarro nga maoy gikasuhan si Benjamin Mudabpe kinsa padulong dinhi sa syudad sa dihang kalit mibuto ang wala nga ligid sa atubangang bahin rason nga nasungag niini ang unang van ug midasmag usab sa laing convoy nga padulong unta sa Lanao del Norte ug Misamis Occidental.
Siya miingon nga sa 37 ka tawo nga nalambigit sa dugu-ong hitabo,namatay sila Police Sr Master Sgt Eric Generalao,Senior Staff Sgt Jobille Lou Cañeda; Police Staff Sgts Michael Ermac;Marjun ReuyanAaron Ticar;Amil Manoop ug Eugene Lagcao ingon man si retired Police Staff Sgt Anito Abapo.
Ang maong mga aktibong pulis ang ubos sa police schooling sa Regional Training Center diha sa Brgy Patag ning syudad.
Dugtong niini,nagpaabot usab sa iyang kasub-anan ug midugang paghatag sa tabang pinansyal si Misamis Occidental Gov. Henry Oaminal ngadto sa mga pamilya sa namatay ug mga naangol nga mga pulis sa aksidente sa Naawan,Misamis Oriental.
Kini human naggikan sa ilang probinsya ang pipila sa mga namatay ug mga angol sa hitabo.
Gihimo ni Oaminal ang kahupayan atol sa iyang pagsilbing dinapit nga mamumulong sa 32nd PNP founding anniversary sa PRO 10 nga nakabase sa Camp Alagar ning syudad.
Naila si Oaminal nga duol sa mga pulis tungod sa iyang dakong pahat sa tabang-pinansyal nga gitunol alang ikalambo sa pipila ka buildings sulod sa Alagar.
