CAGAYAN DE ORO CITY-Gibatikos sa kampo ni kanhi gobernador ug karong City Mayor Oscar Moreno ang giingong pagsilbing utok ni Gov Bambi Emano pagpatangtang niini sa puwesto pinaagi sa mga kaso sa Ombudsman.
Gihimo sa political supporter ni Moreno nga si CSWD officer Teddy Sabugaa ang pasangil tungod sa laing lima ka dismissal orders nga gisilbi sa DILG-10 apan napugngan sa Court of Appeals sa miaging Lunes sa gabii.
Namugos si Sabugaa nga giagi ni Emano sa special audit ang pagpanglutos kang Moreno diin una usab kining naglusad sa walay public bidding nga transaction niadtong gobernador pa sa lalawigan.
Samtang gitambagan ni Misamis Oriental Gov Bambi Emano si Moreno nga i-undang na ang paglipat sa katawhan sa syudad ug lalawigan.
Kini human subli namugos si Emano nga walay kalabutan sa mga kaso sa Ombudsman nga gipasaka batok kang Moreno.
Gihimo sa gobernador ang pagtin-aw human usab direkta kini nga gipanganlan sa mga suporter ni Moreno nga utok sa pagpaningkamot nga wad-on sa puwesto isip city mayor dinhi sa syudad.
Si Emano ug Moreno ang kanhi suod nga mga higala sa miaging katuigan sa lalawigan.
