CAGAYAN DE ORO CITY – Gihataga’g medikasyon sa mga sundalo sa 4th Infantry ‘Diamond Troopers’ Division,Philippine Army ang dinakpan nga samaron nga sakop sa rebeldeng New People’s Army (NPA) nga tipik sa gika-engkuwentro sa 58th Infantry ‘Dimalulupig’ Batallion sa Brgy Mananum Daan,Misamis Oriental ning semanaha.
Kini ang gitaho ni 58th IB commander Lt Col Christian Uy pinaagi sa ilang Civil Military Operations head 2nd Lt MaryKnoll Rhea Cuis sa publiko pinaagi sa interbyu sa Bombo Radyo.
Miingon si Cuis nga ang pagkasikop ni Darryl Ayuma nga nagsilbing liason officer sa SR SDG Eagles, SRC1 sa North Central Mindanao Regional Committee sa CPP-NPA ang epekto sa gipakusog pa nga intense military operation sa maong lugar.
Kini ang rason nga nabiyaan nga samaron si Ayuma sa iyang mga mga kauban nga resulta sa 10 minutos nga sinukliay sa mga bala.
Una usab niini,narekober sa militar ang M-16 rifle sa susamang grupo nga nabiyaan sa encounter site sa bulag nga engkuwentro sa Barangay Bal-ason,Gingoog City niadtong miaging semana.
