CAGAYAN DE ORO CITY – Posibleng kabahin sa tukion ni Pres.Bongbong Marcos atubangan sa katawhan ang pasado nga mga balaod nga iyang gihangyo pinaagi sa executive-legislative agenda o ELA.
Kini may kalabutan sa gitakdang paghimo ni Marcos sa iyang ikatulong State of the Nation Address o SONA sa Batasang Pambansa atol sa joint session sa mga senadores ug mga kongresista adlaw’ng Lunes sa hapon.
Namahayag si Misamis Oriental District 2 Representative Bambi Emano nga nagtoo usab kining dili mosipyat si Marcos sa pagsampit sa isyu sa external security diin nabutang sa alanganin ang posisyon sa Pilipinas tungod sa sunod-sunod nga paggamit puwersa sa China sa West Philippine Sea.
Pasado usab nga grado ang gihatag sa kongresista ngadto sa milabay’ng tuig nga performance ni Marcos.
Samtang halos walay pa’y napamatud-an si Marcos sa iyang mga saad alang sa kaarangan sa katawhan sulod sa halos magtulo ka tuig sa katungdanan.
Kini ang personal nga assessment ni kanhi Intergrated Bar of the Philippines o IBP-Misamis Oriental chapter president Atty. Eddie Cuaresma nunot sa paghatag na usab ni Marcos sa iyang SONA sunod semana.
Miingon si Cuaresma nga pabiling pakyas ang sulti sa presidente nga ibalik sa tag-20 pesos per kilo ang bugas ug nagamit ang katawhan sa ilang saad nga ipaghiusa ang mga lideres sa nasud.
Hinoon,medyo nakaangay usab kini sa gipakitang palisya sa Malakanyang pag-abot sa isyu sa WPS.
