Gihatagan og kabug‑aton sa Climate Change and Energy Programme sa World Wide Fund for Nature (WWF) ang pagsaulog sa ika‑56 nga Earth Day karong Miyerkules.
Sa interbyu sa Bombo Radyo, gipalawom ni Atty. Angela Ibay ang kahinungdanon sa pagsaulog sa maong adlaw karong panahona.
Matod ni Ibay, nagsugod ang Earth Day kapin lima ka dekada ang milabay ug nagpabilin kini nga mahinungdanon tungod sa nagkadaghang suliran sa kinaiyahan nga padayon usab nagkadako matag tuig.
Dugang pa niya, kon kaniadto nakapokus lamang sa tree planting ug clean‑up drives ang mga advocates, karon mas gilapdan na kini aron ipahibalo sa katawhan nga ang mga kalihukan sa tawo adunay dakong epekto sa kinaiyahan, rason nga kinahanglan panalipdan kini.
Gipasabot usab niya nga ang tema karong tuiga nga “Our Power, Our Planet” nagtutok sa pagpadali sa paggamit sa renewable energy isip tubag sa krisis sa enerhiya ug aron masiguro ang malungtarong paggamit sa kuryente.
Tungod niini, gi‑awhag ni Ibay ang publiko nga makigbahin sa mga kalihokan batok sa climate change ug environmental degradation aron mapreserbar ang kalibutan alang sa umaabot nga mga henerasyon.
