CAGAYAN DE ORO CITY-Gikoronahan isip Ms Kuyamis 2018 si Ms. Ana Monica Tanang, ang garbo sa lungsod sa Tagoloan,Misamis Oriental.
Gipildi ni Tan ang laing 19 ka kandidata nga nagtigi sa nag-inusarang titulo isip Ms Kuyamis 2018 coronation night diha sa provincial capitol grounds kagabii.
Nagsilbing 1st runner up si Judith Jay Polestico sa Naawan; 2nd runner up si Ms Kathlyn Mae Ubanan sa Opol; 3rd runner up si Ms Kuyamis Libertad si Jane Magdugo ug 4th runner up si Ms Diane Regis sa Medina.
Gawas sa korona, nasakmit ni Tan ang major awards sama sa Best in Kuyamis Festival Attire ug Best in Evening Gown.
Nakuha usab ni Tan ang minor awards sama sa Ms. Lerouge Salon and Spa ug Ms. MSI.
Samtang mihakot usab sa daghang awards si Polestico sa Naawan pinaagi sa iyang Ms. Photogenic ug Best in Casual Interview, minor awards sama sa Ms. Nature Spring,Ms. To go Travel ug Ms. Aim to Top.
Dugtong niini, kon mahatagan sa tsansa, gusto ni Tan dad-on ang dungog sa tibook Misamis Oriental pinaagi sa pagsalmot sa mga national beauty pageant.
Miingon ang 22 anyos nga dalaga nga wala pa siya’y nakahan-ay nga plano ilabina nga wala niya damha nga maangkon ang korona sa prestihiyosong pageant.
Si Tan, usa ka taekwondo black belter ug kasamtangang nagkuha kurso sa pagka-doctor sa Xavier University.
