CAGAYAN DE ORO CITY – Suportado gihapon sa kadaghanan sa mga empleyado sa Yanson Group of Bus Companies o YGBC nga maoy nagpadagan sa labing dakong public transporation sa Pilipinas nga naglakip na sa Rural Transit Mindanao Incorporated o RTMI.
Kini bisan nga ilegal nga gi-take over sa usa sa mga anak sa pamilya nga si Roy Yanson ang ilang main office sa Bacolod City,Negros Occidental sa miaging semana.
Miingon si Jose Ares,founder sa Mindanao Alliance of Land Transport and General Workers Union o MALTU nga pabiling giila sa kadaghanan si Leo Rey Yanson nga presidente ug chief executive officer sa kompanya samtang walay ilugwa nga ruling ang korte kabahin niini.
Gipasalig usab ni Ares nga dili maapektuhan ang YGBC operations sa tibuok nasud kay gipangitaan na’g sulbad sa pamilyang Yamson ang nasinatian nga suliran.
Una niini,mas gusto sa nagkadaiyang unyon sa YGBC nga si Leo Rey pa gihapon ang mopadagan sa kompanya kay mas maduulan kini sa mga ordinaryong mga empleyado sukad 2007 hangtod sa kasamtangang tuig.
Dumduman nga sa manifesto sa MATCO nga ubos usab sa pagdumala ni Roy,giingong nakasinati sa dakong alkanse ang kompanya ug daghang mga benepisyo ang nahikaw sa mga empleyado sugod 1984 hangtod 2007.
