Naglaum ang interim president sa Young Free Workers nga si Norvin Gavino nga paminawon pag-ayo sa mga senador nga molingkod isip judges ang ebidensya ug ang tingog sa katawhan sa umaabot nga impeachment proceedings batok ni Bise Presidente Sara Duterte sa Senado.
Matud ni Gavino, tungod kay mga politiko usab ang molingkod isip Senate judges, gilauman sa grupo nga magpabiling patas ug magbase ang desisyon sa klaro nga ebidensya, ilabina kon bug-at ang mga alegasyon nga maipresentar batok sa bise presidente.
Dugang pa niya nga ang bag-o lang nga mga kausaban sa liderato sa Senado nagmugna og mga pangutana sa politikal nga direksyon nga posibleng makaapekto sa ubang imbestigasyon sama sa isyu sa korapsyon ug flood control scandal.
Nanawagan usab ang Young Free Workers nga ang katawhan dili lamang mosunod sa impeachment sessions sa impeachment court, apan maghimo og mga lakang aron ipakita sa mga senador nga ang publiko hingpit nga naglantaw ug nagbantay sa proseso.
