GIPASIUGDA ni Daniel Long, youth committee member sa Association for Philippines-China Understanding, nga bisan pa sa backlash nga giatubang ni Vice President Sara Duterte may kalabotan sa alegasyon sa paggamit sa confidential funds, aduna gihapoy daghang batan-on nga nagpadayon og suporta ug pagsalig sa iyang liderato.
Sumala ni Long, nakita niya sa nagkalain laing online platforms nga daghang kabatan-onan ang mipahayag sa ilang opinyon ug suporta human mabasa ang usa ka artikulo nga iyang gi-post sa usa ka website nga naglatid ug nagpasabot sa iyang gihulagway nga kamatuoran luyo sa mga alegasyon batok sa Bise Presidente.
Matod pa niya, ang maong artikulo nagtumong sa paghatag og klarong konteksto kabahin sa isyu, hinungdan nga misunod ang mga komento ug reaksyon gikan sa mga netizens, ilabi na sa kabatan-onan.
Bisan pa sa kontrobersiya, giingon ni Long nga ang ubang batan-on naglantaw gihapon sa performance ug mga programa ni Duterte isip basehan sa ilang pagsuporta. (James Oliver)
