Gibulgar ni Youth for Climate Justice Mindanao Coordinator Khyle Sabellano nga dili ang mga illegal miners apan ang mga dagkong kompanya sa pagmina nga adunay pagtugot sa gobyerno ang mas dakong hulga sa mga lumad ug sa kinaiyahan.
Sa exclusive interview sa BOMBO RADYO, siya mibutyag nga tungod sa panginahanglan sa Pax Silica, nagpadayon ang pagpalapad sa mga legal ug protektadong operasyon sa pagmina nga adunay kumpletong papeles ug suporta gikan sa mga otoridad.
Gipasidaan usab ni Sabellano nga ang maong kalihokan mahimong magresulta sa dugang nga kadaot sa mga yutang kabilin ug tradisyonal nga yuta sa mga komunidad lumad.
Gitumbok niya nga naapektuhan usab ang seguridad sa mga environmental defender ug aktibista nga misupak sa pagpangabuso sa natural nga kahinguhaan sa nasud.
Nanawagan ang coordinator sa publiko nga usisahon ug supakon ang mga kasabutan nga, sumala kaniya, naghatag og legal nga gahum sa mga langyaw ug dagkong negosyante sa pagpalapad sa pagmimina sa kabukiran sa Pilipinas.








