Gisaway sa pundok sa Youth Rage Against Corruption ang pagpanghatag og mga ayuda sa gobyerno karong panahona tungod kay matud pa usa lamang kini ka taktika sa pagpahumot sa imahe samtang nagkaduol ang State of the Nation Address (SONA) ni Presidente Ferdinand Marcos Junior.
Gipahayag ni Joaquin Buenaflor, National Convenor sa maong pundok, nga ang tinuod nga angay buhaton sa administrasyon mao ang pagmugna og mga malungtarong proyekto ug dili kay puro na lang pasundayag aron daygon sa publiko.
Dugang pa niya, ang angay pangandoy sa katawhan mao ang tinuod nga kausaban sa ilang panginabuhian ug dili kay temporaryo lamang nga hinabang nga nagkantidad og duha ka libong pesos ilawom sa UP-LIFT Assistance Program.
Bisan pa man tuod og gilauman nga ireport sa Pangulo ang pag-uswag sa upper-middle-income status sa nasud subay sa banabana sa World Bank, nanawagan gihapon si Buenaflor nga unta bation gyud sa mga Pilipino ang tinuod nga epekto sa ekonomiya.
