Nagpadayag ang ika-40 nga anibersaryo sa EDSA sa gahum sa pagkahiusa sa katawhan, apan sa samang higayon, nagpahinumdom usab kini nga aduna pay mga saad sa konstitusyon nga wala pa matuman. Halos upat ka dekada na ang milabay sukad gi-mando sa konstitusyon nga ang mga magbabalaod maghimo sa balaod batok sa political dynasty, apan hangtod karon wala gihapon kini naaprubahan.
Sumala pa ni Kyle Chester Cotacte, convenor sa Akbayan Youth CDO, usa ka importante nga higayon ang EDSA 40 kay nagpahinumdom kini nga kung magtinabangay ang katawhan, aduna gyud tinuod nga pag-uswag ug lihok nga mahitabo.
Iyang gipasabot usab nga samtang gisaurog ang ika-40 nga anibersaryo, klaro nga aduna pay mga saad nga wala matuman, busa kinahanglan ang padayon nga pagkugi sa katawhan aron masiguro ang hustisya ug patas nga representasyon sa gobyerno.
Gawas pa niini, ang selebrasyon sa EDSA 40 nag-awhag sa katawhan nga maghinumdom sa kahulugan sa pagkahiusa ug sa papel sa matag Pilipino sa pagtabang sa pagpatuman sa mga saad nga gitakda sa balaod ug konstitusyon. (James Oliver)
