MANILA – Luyo sa sobrang kalipay ug kadungganan nga nahatag Olympian gymnast Carlos ‘Caloy’ Yulo sa Pilipinas kay pinakaunang back-to-back gold medalist sa Paris Olympics,mas miinit pa usab ang isyu sa lantuging pinansyal ngadto sa inahan niini nga si Angelika Yulo sa kauluhan.
Kini human unang nabantayan sa Olympics fans nga dili maayo ang relasyong mag-inahan kay may social media posts niini nga nagpunting sa iyang anak nga si Carlo nga apil sa Olympiada.
Gisusi kini sa news team sa Bombo Radyo Philippines ug nahimamat ang pamilya ni Carlo sa ilang pinuy-anan sa kauluhan.
Pagsaysay ni Ginang Angelika nga dili tinood nga gihilabtan ug gigasto niya ang bank savings ni Carlo apan tinud-anay nga may withdrawals siya niini apan dili sa personal.
Miingon si Mrs. Yulo nga wala matago sa iyang anak ang bank withdrawals kay may mga higayon pa gani nga sila nagkuyog kabahin niini.
Kini ang rason nga gihimakak niini ang mga pasangil nga gigasto niya ang mga salapi nga hinaguan ni Carlo.
Hinoon, giakusar niini nga ang hinigugma ni Carlo nga si Chloe San Jose ang kabahin sa rason kon nganong nag-aslom ang relasyong mag-inahan.
Sa pikas bahin, mi-apelar ang amahan ni Carlo nga si Mark Andrew Yulo nga unta motigbabaw ang gugma ug kalinaw sulod sa ilang pamilya.
Kini tungod kay alang kaniya,mas importante ang solido nga relasyon sa pamilya kaysa hisgutanan sa kuwarta.
Mi-apelar kini kang Carlo ug Chloe nga unta husayon na ang isyu kay daghan na ang misakay niini nga naghatag sa dili ensaktong mga impormasyon.
Hisayrang unang wala moangay ang fans ni Carlos kay mas gipaboran pa sa iyang inahan ang gymnast contender gikan sa Japan kay sa anak niini nga anaa lang sa 12th spot sa men’s artistic all-around finals sa miaging semana.
