Gipadala sa provincial government sa Lanao del Sur ang tabang alang sa mga biktima sa baha sa Iligan City tungod sa epekto sa Bagyong Basyang, sumala sa Provincial Disaster Risk Reduction and Management Office sa probinsya.
Sumala ni Shaminoden Sambitory, Provincial DRRM Officer sa Lanao del Sur, miabot ang relief mission sa Iligan City niadtong Pebrero 6, diin gipaabot ang mga medical supplies alang sa mga naapektuhan.
Nagpadala usab ang probinsya sa ilang mga disaster response personnel ug kagamitan sama sa payloader ug tulo ka dump truck aron motabang sa paglimpyo sa debris ug sa clearing operations sa mga nadaot nga kalsada sa syudad.
Padayon karon ang paghatag og suporta ug kolaborasyon tali sa mga LGU aron masiguro nga matabangan dayon ang mga pamilya nga naapektuhan sa baha ug kalamidad sa Iligan City.
Giingon pa sa buhatan nga kini nga ayuda nagpakita sa espiritu sa pagtinabangay sa mga probinsya ingon nga silingan ug igsuong komunidad sa panahon sa emerhensiya. (James Oliver)
