Andam na ang lokal nga kagamhanan sa El Salvador City alang sa mga tawong mudagsa sa Divine Mercy Shrine, sa Huwebes Santo, Biyernes Santo hangtud sa Domingo sa Pagkabanhaw.
Namahayag si Ferlyn Dunn Buna, spokesperson sa City Disaster Risk Reduction and Management Office sa El Salvador nga niadto pang miaging semana mipatuman sa pagpulong ang lokal nga kagamhanan sa syudad, kuyog ang mga kapulisan, mga vendors, rescue ug medical teams, Bureau of Fire Protection (BFP), Philippine Coast Guard (PCG) ug Police Regional Office 10 aron iseguro ang luwas nga pagpanaad sa mga musaka sa labing sikat nga pilgrimage site sa Misamis Oriental.
Lakip sa ilang gilauman ang dakung bulhog sa ihap sa mga peregrino, mga gapanaad, mga batan-on ug bisan ang mga langyaw.
Lakip sa gibantayan ang epekto sa tumang kainit ilabe sa Huwebes Santo ug Biyernes Santo nga kasagaran taas ang ihap sa mga musaka sa Divine Mercy. Giawhag ni Buna ang mga manaad nga musubay sa ilang ipatuman nga security protocols.
