Gipunting ni kanhi Executive Secretary ug Hakbang ng Maisug Lead Convenor Atty. Vic Rodriguez nga dakong kadaot sa produktibidad ug panginabuhian ang tulo ka adlaw nga lockdown sa trabaho, negosyo, ug klase sa Metro Manila atol sa ASEAN Summit.
Gibutyag ni Rodriguez nga nakadugang pa ang maong suspensyon sa taas na nga listahan sa mga walay klase tungod sa mga bagyo ug sa sunod sunod nga holidays sa Nobyembre ug Disyembre.
Gipasabot sa kanhi opisyal nga naglisod na karon ang mga estudyante sa pag apas sa gitakdang school calendar sa Department of Education samtang nagsira usab ang kadaghanan sa mga opisina ug bangko sulod sa tulo ka sunod sunod nga adlaw.
Gidugang ni Rodriguez nga angay timbangon sa gobyerno ang nawalang kita sa mga trabahante ug negosyante itandi sa tulo ka adlaw nga kalihukan.











