Gidepensahan ni United States President Donald Trump ang suod nga relasyon kang Russian President Vladimir Putin bisan pa man sa lapad nga pagsaway sa mga Amerikano human giatake sa Russia ang Ukraine.
Gitaho ni Bombo Senior International News Correspondent Bombo Dolly Ilogon gikan sa New York City nga daghang lungsuranon sa Estados Unidos ang wala mahimuot sa maong panaghigalaay, apan gitindugan gihapon ni Trump ang pagtawag kang Putin isip usa ka higala.
Gidugang sa Bombo correspondent nga nagdumili si Trump sa pagbutyag ngadto sa publiko sa Amerika kon unsa gyud nga matang sa panaghigalaay ang nagbugkos sa duha ka lider.
Gitataw ni Ilogon nga nagpabiling kontrobersyal sa Estados Unidos ang kasuod ni Trump ngadto sa lider sa Russia taliwala sa nagpadayong kagubot sa Ukraine.








