Gipasidan an ni kanhi Executive Secretary Atty. Vic Rodriguez ang publiko nga dili magpadala sa mga pagdayeg ni United States President Donald Trump ngadto kang Presidente Ferdinand Marcos Jr. atol sa ASEAN Summit.

Gipadayag ni Rodriguez nga kabahin lamang sa diplomatikong pamatasan ngadto sa host country ang pagtawag ni Trump nga “amazing” ang Presidente ug isip usa ka “tough negotiator”.

Gihulagway sa kanhi opisyal ang nahitabo sa milabayng pagbisita ni Marcos sa White House diin misaka pa hinuon gikan sa 17 porsyento ngadto sa 19 porsyento ang taripa sa mga produkto sa Pilipinas nga mosulod sa Estados Unidos.

Giklaro ni Rodriguez nga usa ka hanas nga politiko si Trump nga mohatag og maayong pulong atubangan sa kamera bisan pa man sa mga suliran nga giatubang sa nasud.