CAGAYAN DE ORO CITY, Philippines – Dul-an 1,700 ka tawo na ang patay sa 7.7 magnitude nga linog sa Myanmar ug sa Thailand. Subay sa ASEAN Emergency Response and Assessment Team (ASEAN-ERAT) nga anaa sa 1,644 ang kumpirmadong patay, subay sa body count sa mga lawas nga nahaw-as gikan sa mga nahugno nga gambalay.
Lakip sa mitabang sa paghipos sa mga lawas sa patay mao ang managlahing international organization aron hatagan sa tsansa ang mga pamilya sa pag-ila sa ilang mga minatay ayha e-prepar ang ilang paglubong.
Subay sa labing ulahing data nga nadawat sa International Medical Corps, anaa sa 3,400 ang samaran nga gilakipan sa daghang mga rescuers, tungod sa kalisdanan sa pagrekober sa mga lawas sa nga tawong napiit sa mga dagkung tipaka sa mga gambalay. Mihatag usab sa medical ug mental health care ang IMC alang sa kapin usa ka milyon ka pamilyang apektado sa kusog nga linog.
Kagahapon, miabot na ang United Nations Crisis Relief nga mihatag sa $5 milyon nga pondo alang sa life-saving assistance.
Samtang ang mga non-profit organizations sama sa Water Mission ug Canadian Red Cross nagpadala sa ilang mga teams e-asses ang kalapad sa damyos sa linog ug paghatag sa medical, pagkaon, ug non-food items sa mga biktima sa kalamidad.
Una nang namahayag ang United State Geological Survey (USGS) nga muabot sa 10,000 ka tawo ang posibleng patay ug samaran sa kusog nga linog.
