CAGAYAN DE ORO CITY – Gisuta sa fire investigators kon unsay hinungdan sa pag-ulbo sa sunog nga milamoy sa 5 ka balay diha sa Zone 2, Molugan Teachers Village, El Salvador City, Misamis Oriental.
Sa pakighinabi sa Bombo Radyo, gibutyag ni El Salvador City Fire Marshall Sam Lawrence Velarde nga ilang gitutukan ang posibilidad nga nagsumikad ang kalayo sa napasagdan nga ‘baga’ sa dirty kitchen ni Raul Labitad.
Miingon si Velarde nga bisan ang mga silingan sa pamilyang Labitad ang mibutyag nga nag-gikan sa ilang balay ang kalayo.
Dili mominus sa usa ka milyon ka pesos ang ‘structural damaged’ sa maong sunog.Samtang gilamoy sa kalayo ang unom ka balay ang hurot ug kasunog diha sa Sitio Calatrava, Barangay Cogon,Balingasag,Misamis Oriental.
Gibutyag sa isa sa mga residente nga si Mr. Henry Polinar nga namatikdan niya kaganihang mga alas tres sa sayong kadlawon ang paspas nga pagdako sa kalayo hinungdan sa pagkasunog sa maong mga balay.
Dugtong ni Polinar nga nakita niya ang pagsugod sa kalayo sa ikaduhang andana sa pinuy-anan ni Niña Giging Valmores.
Walay naangol ug nasamdan sa maong hitabo tungod sa gihimong bayanihan o pagtinabangay sa mga residente.
