Aduna pa’y gibana-bana 12 ka lubnganan nga wala pa sirad-e ang “panchon” sulod sa City Memorial Park o naila niadto isip Bolonsori Cemetery sa Brgy Camaman-an, ning syudad.
Kini maoy unod sa special report ni Konsehal Yvy Emano sa gilusad nga regular sesyon sa konseho, kagahapon.
Gusto ni Emano nga aksyonan dayon kini sa tagdumala sa sam-ang tungod kay nagpanimaho na ang mga lawas sa patay nga gilusod lang sa lungag nga walay selyo.
Gipasabot ni Emano nga balaan ang lawas sa tawo, ug importante nga hatagan kining plastar nga lubnganan. Gawas niini, iyang gipasabot nga dili maayo nga musingaw ang patay nga lawas sa tawo kay maka-apekto kini sa kalidad sa hangin sa mga namuyo palibot sa sam-ang.
