Mi-rehistro na sa 5,214 ang gipatuman nga HIV tests, sugod sa bulan sa Enero hangtod Oktubre ning tuiga, dinhi sa syudad.
Subay kini sa data gikan sa Nest Wellness Hub.
Gibutyag ni Dr. Ronald Romano, doktor ug clinic manager sa pasilidad nga nagresulta ang test sa 124 reactive test result.
Kini nagpasabot nga sugod sa unang bulan sa tuig 2025, misaka pa sa kapin 120 ka tawo ang nagpositibo sa HIV.
Gika-alarma sa mga health expert ang pagsaka sa positivity rate sa 2.37%. Hinoon, mas ubos kini itande sa 3% hangtod 3.5% nga average rates sa mga miaging tuig.
Apan, mipasabot si Dr. Romano nga kinahanglan dili mokompiyansa ang katawhan kay labihan ka mananakod ang bayrus nga dala sa HIV, kung dili sagulan sa pag-amping ang pakighilawas.
Una niini, gihulagway ni Romano ang HIV isip usa ka “double-edged sword”, nga mobalik ang risgo sa pagkaylap kon dili hapsay ang tracking, regular testing, ug pagdawat sa tambal sa mga natumbok nga kaso.
