Nasikop ang 13 ka indibidwal ug nakumpiska ang gaming equipment nga nagkantidad og gibana-banang 12 milyon pesos sa joint anti-POGO operation sa Philippine National Police (PNP) ug Presidential Anti-Organized Crime Commission (PAOCC) sa Iligan City niadtong Oktubre 29, 2026.
Gipahigayon ang maong operasyon sa usa ka kompanya nga nagpakaron-ingnon matud pa nga Information Technology Service Provider apan dunay kalambigitan sa ilegal nga offshore gaming activities sa Barangay Hinapolan, Iligan City.
Lakip sa mga nasikop ang duha ka manager ug 11 ka online dealer. Nakumpiska usab ang mga computer, monitor, camera, tablet, gaming table ug uban pang mga gamit sa operasyon.
Anaa na sa kustodiya sa Police Station 1 sa Iligan City Police Office ang mga suspek alang sa tukmang dokumentasyon ug legal nga proseso, samtang gipangita pa ang rehistradong nanag-iya sa maong kompanya.
Gipahigayon ang maong operasyon sa koordinasyon sa nagkalain-laing yunit sa PNP, National Bureau of Investigation (NBI)-Iligan ug PAOCC isip kabahin sa gipakusgan nga kampanya sa kagamhanan batok sa ilegal nga POGO ug online gambling operations. (raniel mahunyag)
