
Miligid na ang pagtukod sa kaso o case buildup sa National Bureau of Investigation – National Capital Region (NBI-NCR) may kalabotan sa ₱524 milyon nga gituohang smuggled nga mga sibuyas human gipatawag o gi-subpoena ang mga opisyal sa cold storage facility sa Valenzuela City.
Matod pa sa pamahayag, base sa taho sa Bureau of Customs (BOC), wala makapakita og mga dokumento sa pag-import ang tag-iya sa cold storage sulod sa 15 ka adlaw nga gihatag kanila, hinungdan nga nagpagawas sa Warrant of Seizure and Detention (WSD) ang komisyoner.
Gidugang usab nga gi-subpoena na sa NBI ang mga director, manager, ug mga tag-iya sa cold storage samtang nagpadayon ang imbestigasyon.
Gibutyag sa mga opisyal sa pasilidad nga adunay mga nangabang o lessees nga gihulagway nga mga lokal nga mag-uuma, apan gi-subpoena usab sa ahensya ang maong mga lokal nga mag-uuma.
Sa pagkakaron, padayon nga gihimo sa NBI ang case buildup aron masuta ang tanang detalye sa maong insidente.




