Gipaambit ni Presidente Ferdinand Marcos Jr., nga wala siya makabaton sa taas nga pakigpulong uban kang Chinese President Xi Jinping atol sa iyang pagbisita sa China tungod sa kaabtik ug kahuot sa iskedyul sa mga lider.
Gipasalamatan niya ang mainitong pagdawat sa China ug gihulagway kini nga makadasig ug makapatagbaw bisan pa sa mga kalainan tali sa duha ka nasod.
Nakig-estorya usab ang Pangulo kang Chinese Foreign Minister Wang Yi atol sa gala dinner diin ilang nahisgutan ang iyang unang pagbisita sa Shenzhen niadtong 1974 ug ang dakong kalamboan sa siyudad sukad niadto.
Gihisgutan usab nila ang papel sa pamilya Marcos sa pagpalig-on sa relasyon tali sa Pilipinas ug China ug ang mga paagi aron mapalambo pa kini sa umaabot.
Mipadayag si Marcos nga nakakita siya sa pag-uswag sa ilang panag-estorya, ilabina sa pagpangitag paagi aron maminusan ang tensyon sa West Philippine Sea ug mapalambo ang pagsinabtanay tali sa duha ka nasod.






