
Gipanghimakak ni Philippine Ambassador to the United States Jose Manuel Romualdez nga ang mga lihok protesta batok sa pagbisita ni US President Donald Trump sa Pilipinas kay maoy hinungdan sa wala pagpirma sa kasabutan alang sa US-led Pax Silica initiative.
Matud ni Romualdez, gihatagan pa sa Estados Unidos ang Pilipinas og panahon aron repasohon ang mga detalye sa kasabotan, lakip ang mga kondisyon niini ug ang mga probisyon nga angay dawaton sa nasud.
Gipasabot usab niya nga dili angay dalion ang proseso aron masiguro nga masabtan ug matimbang-timbang pag-ayo ang mga posibleng benepisyo ug epekto sa maong proyekto.
Dugang pa niya, gisugyot usab ang pagpasa og balaod nga maglatid sa pagpatuman sa inisyatiba ug nga pagahisgotan kini sa Kongreso ug Senado aron masiguro ang malungtarong mga benepisyo niini alang sa nasud. (raniel mahunyag)




