PNP, nagpagawas og pahayag bahin sa alegasyon Sara Duterte sa giingong pagpugong sa kanhi staff sa BGC hotel. Walay timailhan sa pinugos nga pagpugong.

Nagpagawas og pahayag ang Philippine National Police (PNP) bahin sa nagkatag nga mga alegasyon sa social media nga giingong pinugos nga gihuptan sa usa ka hotel sa Bonifacio Global City (BGC) ang usa ka kanhing household staff member ni Vice President Sara Duterte ug upat pa ka kauban niini.

Lakip sa mga alegasyon ang matud pa pagpugos sa giingong mga indibidwal nga pirmahan ang usa ka affidavit nga nagbaton og mga dili tinuod nga pasangil, ingon man ang pagpanghulga sa ilang kinabuhi.

Sumala sa PNP, seryoso ang maong mga alegasyon nga naglakip sa giingong pagpugos sa pagpirma og affidavit nga adunay dili tinuod nga mga akusasyon ug mga hulga batok sa ilang kinabuhi, busa kinahanglan kining imbestigahan subay sa balaod.

Base sa beripikasyon sa kapulisan niadtong Nobyembre 17, 2026, duha ka abogado sa kanhing kawani ang mihangyo og police assistance sa Fort Bonifacio Police Sub-Station 1 aron tabangan sila sa pagkuha sa lima ka mga indibidwal nga giingong gipugngan sa maong hotel.

Nasuta sa mga pulis pag-abot sa lugar nga walay klarong timailhan sa pagpugong sa ilang kagawasan ug walay gisumbong nga direktang hulga sa ilang kaluwasan, diin boluntaryong miuban ang mga indibidwal ngadto sa estasyon sa kapulisan.

Gipasiugda sa PNP nga bisan nagdumili ang lima ka mga indibidwal sa paghimo og gipanumpaang pahayag o pagtudlo sa mga responsable sa giingong insidente, andam gihapon kini sa pagdawat og pormal nga mga reklamo ug paghatag og hustong proteksyon samtang nagpabiling usa ka apolitikal ug walay piniling institusyon ang ilang ahensya. (raniel mahunyag)