
Gipadayag ni Pope Leo XIV ang iyang interes sa pagbisita sa Pilipinas, sumala kang Kalookan Bishop Cardinal Pablo Virgilio “Ambo” David.
Matud ni David, pormal nang gipahibalo sa Simbahan sa Pilipinas ang Santo Papa nga malipayong dawaton siya sa nasud, ilabina kay gilauman siyang mobisita sa South Korea alang sa World Youth Day nga ipahigayon sa Seoul gikan Agosto 3 hangtud 8, 2027.
Gipasabot usab sa kardinal nga mahimong praktikal ang pagdugang sa Pilipinas sa iyang biyahe tungod sa kaduol sa duha ka nasud, apan wala pa’y kumpirmadong iskedyul alang sa maong pagbisita.
Sa wala pa mapili isip Santo Papa, nakabisita na si Pope Leo XIV, nga kaniadto nailhan isip Father Robert Francis Prevost, sa Pilipinas isip lider sa Augustinian Order, patikular na sa Manila ug Cebu, ug kaniadto gihulagway niya ang Pilipinas isip iyang “home base in Asia.”
Sa kasamtangan, malaumon gihapon ang mga lokal nga alagad sa simbahan nga madayon ang pagbisita sa Santo Papa sa Pilipinas sa sunod tuig. (raniel mahunyag)



