CAGAYAN DE ORO CITY – Ikatag sa Police Regional Office 10 ang dili mo-ubos 2-mil ka pulis kuyog ang augmentation forces sa mga lugar diin dagsa ang katawhan sa pag-obserbar sa mga kalihukan sa semana santa.
Miingon si Police Regional Office 10 spokesperson Police Maj. Joann Navarro nag-unang tuyo niini nga dili malutsan sa posibleng sabotahe sa mga terorista o pundok sa CPP-NPA ang pagbalaan sa katawhan.
Namahayag si Navarro nga hinoon, wala sila’y nadawatan nga seryosong bahad nga manghasi ang maong mga grupo apan nakaisa ang taas nga alerto sa Northern Mindanao hangtod sa Domingo sa pagkabanhaw.
Samtang nag-doble kayod usab pagpatuman sa hugot nga seguridad ang naglangkob sa Task Force Oro aron walay kagubot nga mahitabo samtang magbalaan ang katawhan sa semana santa.
Kini maoy gisulti ni Army Col. Warren Munda,commander sa Task Force Oro diin nakahimo na sila’g pakigtagbo sa city govt officials sa angay buhaton.
Namahayag usab ang opisyal nga subay sa threat assessment sa National Intelligence Communication Agency o NICA 10, pabiling anaa lang sa alert level 1 ang kahimtang sa seguridad sa tibuok rehiyon.
Sa pikas bahin,nagsugod na sa pag-abot-abot ang mga deboto nga magsilbing mohimo’g panaad ug maniid alayon sa pag-obserbar sa mga mahal nga adlaw sa isla sa Camiguin.
Namahayag si kanhi Bonbon Punong Brgy Christopher ‘Toping’ Rodriguez nga dugay na sila nga naka-prepara ilabina nga gilauman sa provincial govt ang pagdagsa sa katawhan sukad giwagtang ang health emergency epekto sa COVID-19.
Gipasabot usab ni Rodriguez nga pabiling pangayuan sa probinsya sa QR code ang mosulod-gawas nga katawhan isip kabahin sa security monitoring niini.
Hisayrang highlight sa pagtamod sa semana santa sa Camiguin ang paglusad sa mga deboto sa tinuig nga paglibot sa isla ug pagsaka sa bukid alang sa station of the cross.
