CAGAYAN DE ORO CITY – Napun-an pa ang paghuyang sa teroristang Maute-Dawlah Islamiyah nga naglihok sa bukirang bahin sa Lanao provinces.
Kini tungod sa pagtahan sa duha ka miembro niini balik sa gobierno dala ang ilang mga armas sa mga otoridad sa Población,Munai,Lanao del Norte.
Gitumbok ang mga nag-surender nga sila alyas Turab,17 anyos nga taga-Coyontor,Kauswagan ug alyas Habab,21 anyos nga gikan sa Lininding,Munai.
Gibutyag ni Lanao del Norte Police Provincial Director Col Roy Magsalay nga napasayon ang pagbalik sa gobierno sa duruha tungod usab sa pagtabang sa ilang mga pamilya ingon man kabanay.
Siya miingon nga ang ilang special units sa PNP ug tropa sa mga sundalo ang nag-pasilitar sa pagkuha sa nag-surrender nga Maute-DI members.
Bitbit pagtahan sa mga terorista ang mga armas nga REMINGTON ARMS ILION N.Y U.S.A. SERIAL NO. DL 938752 AFP PROPERTY CAL. 223-5.56MM MOD. P.4 nga dunay magazine ug 13 ka round sa 5.56MM ug U.S. RIFLE 7.62MM M14 H&R ARMS CO. SERIAL NO. 923293.
Hisayrang ang maong grupo ang salin-salin sa Maute-ISIS group nga utok pagpangatake sa Marawi City nga nag-resulta sa pila ka bulan nga giyera tali sa gobierno niadtong Mayo 2017.
