CAGAYAN DE ORO CITY, Philippines – Patay ang duha ka batan-ong police officer human nakigpinusilay ang usa ka traffic violator sa Virginia, USA kagabii, oras dinhi sa Pilipinas.
Giila ni Virginia Beach Police Chief Paul Neudigate ang mga namatay nga sila Officers Christopher Reese ug Cameron Girvin.
Sa CCTV footages, makita ang paglakag sa police patrol sa usa ka asul nga Hyundai Sonata nga paso na ang lisensya sa plaka.
Kalmado nga gihangyo sa duha ka pulis ang driver nga mukanaog apan samtang naglakag, naigo sila sa kritikal nga bahin sa lawas ug namatay.
Dihang naka-ikyas ang suspek, gilusad ang mga operatiba sa follow-up operation ug napalgan ang sakyanan nga nakaparada sa Sylvan Lane.
Kilid sa usa ka apartment nakit-an ang nagbuy-od nga lawas sa suspek nga si John McCoy III, 42 anyos, nga may igo sa ulo.
Gipamugos sa mga operatiba nga nagpusil sa kaugalingon ang suspek kay susamang armas ug bala ang gigamit niini sa pagpatay sa duha ka police officers.
Nadiskobrehan sa mga operatiba nga si McCoy dugay na nga may kasong felony sukad tuig 2009 ug nakalapas sa pagbaton ug ilegal nga armas.
Wala pa masayod ang mga otoridad sa matuod nga motibo ngano nga gipatay niya ang duha ka police officers.
