CAGAYAN DE ORO CITY – Direktang gisupak sa duha sa 20 ka dagkong kristiyanong simbahan ang tinguha sa Limketkai & Sons Incoporated nga motukod sa casino o balay sugalan sulod sa ilang business coverage area diha sa Brgy Lapasan sa syudad.
Kini human nag-atubang ang representante sa maong kompanya ug ang sektor sa akademya ug relihiyosong sektor sa gipatawag nga komite hearing sa konseho sa syudad kagahapong adlawa.
Miingon si Msgr Boy Salvador sa simbahang Katoliko nga dili kalambuan ang dala sa casino apan pagbungkag sa pamilya dinhi sa syudad.
Gibutyag ni Salvador nga daghan na’g suliran ang syudad ilabina sa illegal drug addiction sa libuang indibidwal hinungdan nga kusganong gisupak nila ang maong tinguha.
Susamang pagsupak usab ang gipabati sa United Church of Christ in the Philippines o UCCP nga mitambong sa konsultasyon kagahapong adlawa.
Una nang giimbitar sa konseho ang 20 ka representante sa kasimbahanan nga naglakip sa Iglesia Ni Cristo,Iglesia Independiente apan simbahang Katoliko ug UCCP lamang ang nakatunga.
Hisayrang nagpadala pa’g pastoral letter ang Archdiocese of Cagayan de Oro atubangan sa komitiba nga games and amusement ni City Councilor Zaldy Ocon diin gibasa ang pipila ka punto nganong babagan nila ang pagbaton sa casino sa dakbayan.
