CAGAYAN DE ORO CITY – Nawad-an sa pinuy-anan ang sobra 200 ka pamilya o halos 800 ka indibidwal sa dakong sunog nga natigayon sa utlanang bahin sa Brgy Lapasan ug Brgy Puntod ning syudad.
Gibutyag ni BFP-CdeO ground commander SFO4 Samson Velarde nga partikular nga miulbo ang sunog sa ikaduhang andana sa balay ni Virginia Laga sa Sitio San Isidro Labrador,Lapasan ug misulod sa porsyon sa Saint John,Brgy Puntod kagahapon sa buntag.
Miingon si Velarde nga hinoon walay kinabuhi nga nakalas apan samaron ang residente nga si Ronilo Lapadan kay mitabang sa pagpalong sa kalayo.
Gi-imbestigaran pa sa BFP ang teorya nga ang napasagdan nga pagluto ang hinungdan sa sunog diin dunay halos 2 milyon pesos nga structural damage.
Samtang kasamtangang gipahimutang sa Lapaz 1 covered court ang mga biktimang pamilya sa dakong sunog ning syudad.
Gibutyag ni Lapasan Punong Brgy Julito Ogsimer nga anaa sa 134 ka balay ang apektado diin 118 usab niini ang nahurot pagkaon sa kalayo.
Namahayag si Ogsimer nga bukas ang ilang buhatan sa dugang mga tabang-pinansyal ug in-kind nga aron magamit sa mga biktima sa trahedya.
Nasuta nga anaa sa lima ka grupo sa claimants ang nag-ilugay sa yuta diin nakabase ang mga biktima sa sunog.
Dugtong usab niini,gihulat sa konseho sa brgy ang hukom sa city govt kon maka-avail ba sa relocation program ang mga biktima sa sunog sa syudad.
Kini samtang temporaryo sila nga gipangbutang sa covered court ug tunulan sa serbisyo sulod sa lima ka adlaw sa brgy.
Miingon si Ogsimer nga kon dunay pagkalangan ang hukom sa syudad,napugos usab sila sa konseho nga ibalik ang mga biktima sa sunog sa yuta nga gi-ugbukan sa ilang mga puluy-anan.
Dumduman nga sa miaging mga bulan ning tuiga,nasunugan usab ang daghang pamilya sa Hillside,Upper Kolambog sa mao gihapon nga brgy.
