CAGAYAN DE ORO CITY – Tigdawatan na sa suhulan nga 405 kada-adlaw ug laing 390 pesos ang mga trabahante nga ubos sa non-agriculture sector nga gibahin sa category 1 ug 2 dinhi sa rehiyon epektibo sa petsa 16 ning bulana.
Kini ang subli pagpadumdom sa Regional Tripartite Wages and Productivity Board 10 ngadto sa mga pribadong trabahante ug sa mismong mga kompanya o employers niini.
Miingon si RTWBP 10 Board Secretariat Atty Verjel Walag nga balaod kini nga unang nauyunan sa pribadong sektor ug sa employers hinungdang angayang sundon pag-abot sa maong petsa.
Dugang ni Walag nga gawas sa maong pagsaka sa suhulan,mahimo na usab nga 390 pesos ang inadlawan sa mga trabahante nga ubos sa agricultural sector nga giapilan sa category 1 & 2 ug laing 378 pesos ngadto sa kategorya nga 3 ug 4.
Kini nga umento nakab-ot sa duha ka panig tungod usab sa giduso nga wage increase petition sa grupong ALU-TUCP sa buhatan sa DOLE-10 ning tuiga lamang.
Samtang wala na’y ihatag nga konsiderasyon ang buhatan ngadto sa mga kompanya kabahin sa 2nd tranche sa wage increase alang sa mga pribadong trabahante dinhi sa rehiyon.
Miingon si Walag nga mihupas na miaging Agosto ang aplikasyon sa pagpangayo’g exemption rason nga obligado na ang mga kompanya pagtuman niini.
Siya miingon nga angayang sundon kini sa mga kompanya aron kalikayan nga mag-atubang sila’g kaso.Sa miaging unang hugna sa wage increase,pipila ka mga kompanya ang nasapon ug napahamtangan sa silot.
