CAGAYAN DE ORO CITY – Patay nang naabtan sa rescue teams gikan sa Bureau of Fire Protection ug Balingasag Disaster Risk Reduction Management Office tulo ka gitoohang treasure hunters ilawom sa atabay sa Purok 8,Sitio Sugong Bagaay,Barangay Baliwagan,Balingasag,Misamis Oriental.
Kini human gitinguha unta sa team ni BFP-Balingasag Fire Marshall Fire Insp Edgar Lawan kuyog ang Balingasag MDRRMO nga pulos mahaw-as buhi ang unom ka gitoohang namulawan sa maong lugar.
Apan paghidangat sa duha ka team sa lokasyon,pulos patay na ang mag-amahan nga si Alberto Sr,48 ug Alberto Saratao Jr,16 anyos ingon man si Jeffrey Mingo,30 anyos sulod sa atabay.
Saysay sa rescue teams nga naglisod sila’g sulod sa lokasyon aron unta mapahigayon ang dinalian nga pagluwas sa mga nalukong nga namulawan rason nga tulo sa unom ang disgrasyang-namatay.
Naluwas hinoon ang laing tulo nga kauban sa mga biktima nga naglakip kanila ni Felisito Mingo kinsa igsoon ni Jeffrey ingon man ang mag-apuhan nga si Carlito Flores ug Joshua Valante diin paspas gidala sa provincial hospital sa lungsod.
Wala pa’y opisyal nga gilugwa nga pahayag ang BFP-ug MDRRMO Balingasag sa rason sa kamatayon sa mga biktima apan dunay pagduda sa pipila ka silingan nga posibleng epekto kini sa kemikal nga gipahimutang sa lugar.
