CAGAYAN DE ORO CITY – Miani’g sagu-sagol nga reaksyon ang gisulti sa National Economic Development Authority (NEDA) nga dili makonsiderar nga nihit sa pagkaon ang usa ka tawo kon magasto siya’g 64 pesos sa tulo na ka konsumuhan.
Kini human nasampit isip tubag ni NEDA Secretary Arsenio Balisacan sa paggisa kaniya sa pipila ka senador ang maong datos gikan sa ubang ahensiya sa gobierno nga napulo ka tuig na ang nakalabay.
Miingon sa interbyu sa Bombo Radyo si Misamis Oriental -Cagayan de Oro MSMEs Development Council chairman Raymundo ‘Ray’ Talimio Jr nga dili unta kini angay ilugwa nga detalye nga walay pag-dobli susi aron kalikayan mabutang sa kompromiso ang kredebilidad sa gobierno.
Siya miingon nga angayang magkahiusa ang mga hingtungdang ahensiya pag-abot sa maong isyu kaysa ang NEDA ang mapasanginlan nga unta kini nga numero ang resulta sa trabaho sa ubang mga buhatan sa gobierno.
Dugang ni Talimio nga imposible kini nga eksena ilabina nga naghinobra ang pagmahal sa mga batakang palaliton ug dili gani kini igo kon lima ka tawo sulod sa usa ka simpleng pamilya ang mokonsumo niini.
Mitapos kini sa pag-ingon nga hayan masunod ang maong budgetary meals apan dili sangkap sa nutrisyon ang makonsumo sa tawo kay posibleng nagmantiner lang kini sa tinapa o noodles nga klaro nga walay makuha nga sustansiya ilabina alang sa kabataan.
