CAGAYAN DE ORO CITY – Gi-imbitaran sa National Bureau of Investigation – 10 ang unom ka opisyal sa Cagayan de Oro Water District sa pagtunga sa ilang buhatan sa Misamis Oriental provincial compound ning syudad.
Kini aron makuhaan sa ilang panig nunot sa imbestigasyon nga gihimo sa NBI subay sa hangyo ni interim General Manager Fermin Jarales kabahin sa giingong mga kahiwian sulod sa COWD.
Apil sa gipa-subpoena sa NBI sa maong katuyuan mismo si COWD Assistant General Manager Engr Edna Najeal; COWD Management Services Department Manager Shouldie Laranjo;COWD Executive Assistant and Board Secretary Maria Mercedes Batar;Maria Evelyn Vasallo sa COWD Cash Management Division; Moises Echano sa COWD Eng’g Management Division ug COWD Finance Department Manager Vanessa Chiu.
Giaghat ang maong COWD officials nga dad-on ang supporting documents nga gipangayo sa NBI investigation ug dili angayang mapakyas aron kalikayan ang mga kasupakan sa balaod.
Una nang nahimugso ang panabangga tali sa interim ug regular COWD officials epekto sa pagdumili mabayran ang sobra 400 milyones pesos nga obligasyon nga tubig nga gi-suplay sa Cagayan de Oro Bulk Water Incorporated o COBI.
Dumduman nga gimando ni Pres. Bongbong Marcos sa Local Water Utilities Administration o LWUA nga tutukan ug pangitaa’g sulbad ang disputed financial claims tali COBI ug COWD rason gibutanga’g interim officials.
Apan wala ilha ug gi-kuwestiyon sa regular COWD officials ang LWUA takeover kay gi-basehan nila ang unod sa Presidential Decree 198 nga wala kini hurisdiksyon manginlabot sa contractual issue tali COBI.
Hisayrang sa ulahing sitwasyon sa COWD,wala na pasudla sa regular management si Jarales kay alang kanila nagsilbing ‘outsider’ ang produkto sa kamanduan ni Marcos ngadto sa LWUA.
