CAGAYAN DE ORO CITY- Gipanganti ni 403rd Brigade commander Col Edgardo de Leon nga dili nila walaon ang bag-ong kampo nga gitukod
nga unang giharass sa mga rebeldeng New Peoples Army NPA sa Sitio Green valley,Brgy Dalwangan, Malaybalay City, Bukidnon.
Sumala pa ni De Leon nga ilang gitukod ang kampo tungod sa hangyo sa mga residente. Siya miingon nga magpabilin ang kampo sa maong
lugar bisan makapila kahigayon kini nga atakehon sa mga terorista.
Una niini, duha ka sundalo ug upat ka mga rebelde ang patay human magka-engkwentro sulod sa pipila ka minutos ang duha ka panig.
Gipasalig ni De Leon nga dili sila magpalupig sa rebeldeng New Peoples Army o NPA.
Miingon si De Leon nga bisan kulang ang ihap sa ilang tropa nga magbantay sa bag-ong tukod nga kampo,pangitaan nila’g paagi nga dili
sila mabintahaan sa mga rebelde.
Maoy hangyo ni De Leon sa mga armado nga dili apilon ang mga sibilyan sa ilang himoong pagpangatake ug mag-pokus sa mga sundalo nga maoy ilang kaaway.
Una nang narekober sa militar sa engkwentro ang duha ka M16 rifles; 2 unexploded anti- personnel mines; 200 meter wires, ammunition, magazines for M16 rifle ug mga gamit sa NPA.
Samtang gitawag sa mga rebeldeng NPA nga kadaugan ang pag-atake sa bag-ong kampo nga gitukod sa mga sundalo sa Sitio Green valley,Brgy Dalwangan, Malaybalay City, Bukidnon.
Kini bisan nga namatyan sa upat ka mga miembro ang ilang grupo sa engkwentro.
Sumala ni Ka Malem Mabini, tigpamaba sa CPP-NPA North Central Mindanao Regional Committee nga giila nila nga kalampusan ang pagkarekober sa pito ka tag-as nga kalibre sa armas nga gipanag-iyahan sa mga sundalo.
